Fyllt svínalund með kjúklingabaunum

15 Nov 2017

Fyllt svínalund með beikoni og kjúklingabaunum.

Mér finnst fyllt svínalund alveg ótrúlega góð og ég er dugleg að prufa mig áfram með allskonar fyllingar og þessi heppnaðist mjög vel.

Svínalund er ódýrt kjöt og heil lund er ofboðslega gott kjöt.

Lundin getur oft orðið þurr og bragðlaus ef maður eldar hana eina og sér. Þess vegna fylli ég þær alltaf og vef svo annaðhvort beikoni eða parmaskinu utan um, þannig má búa til smá fitulag utan um kjötið til að halda rakanum inni í því. 

Í fyllinguna nota ég nú bara oftast það sem ég á til í heima eins og til dæmis fetaost, parmesan ost, hnetur, t.d. furuhnetur, sólþurrkaða tómata, kryddjurtir, sveppi, lauk, spínat og ólífur. Notaðu bara það sem þú átt til eða dettur í hug, ekki vera hrædd við að prufa þig áfram.


Í þessa lund notaði ég:

Geitaost (getur notað hvaða ost sem er ef þú ert ekki fyrir geitaost eins og t.d camenbert)

2-3 sneiðar grillaða papriku

4-5 sólþurrkaða tómata

2 lúkur spínat 

1 lúka valhnetur

1 pakki beikon
 

Byrjaðu á því að sjóða spínatið í 1 mínútur og kæla það síðan undir köldu vatni. Þurrkaðu það með því að kreista sem mestan vökna frá því og saxa það síðan smátt og setja í skál.

Skerðu sólþurrkuðu tómatana smátt, grillaðri paprikuna og valhneturnar.
Blandaðu öllu saman í skál með smá olíu, salti og pipar.

Svínalundina skar ég í tvennt til að passa í pottinn. Skerðu í miðjuna og svo út í hliðarnar og reyndu að fletja hana út eins mikið og þú getur en passaðu að skera ekki í alveg í gegn eða alveg út í enda. Notiði bara lítinn hníf og skerið þetta rólega. Byrjaðu á því að raða fyllingunni í og raðaðu svo nokkrum geitaostasneiðum yfir.



Að lokum klemmdu hana aðeins saman og rúllaði beikonsneiðum í kringum hana.
Í pott eða eldfast mót settu 1 dós af kjúklingabaunum með smá olíu, salti, pipar og smá rósmarín.
Leggðu svínalundirnar ofan á kjúklingabaunirnar.



Lokaðu pottinum eða settu álpappír yfir og settu inn í ofn í 45mín á 180° tók. Taktu lokið af síðustu 10 mínúturnar.





Kjúklingabaunirnar draga í sig mikinn kraftinn frá kjötinu, fyllingunni og beikoninu og verða alveg ótrúlega góðar með. Ég var með salat með lundinni því fyllingin og kjúklingabaunirnar voru alveg nóg með. Ég átti smá rauðlauksultu inní ísskáp og hún passaði vel með smá til hliðar. Ef þér finnst vanta sósu getur þú gert einhverskonar sósu með en það er það mikill kraftur og bragð af lundinni að mér finnst það ekki þurfa.



Ef þú prófar þessa uppskrift þætti mér gaman að fá að vita. Skildu eftir skilaboð hér fyrir neðan, eða taktu mynd og # á myndinni á Instagram #femmeisland