Sunnudagsmogginn

28 Jan 2018

Ég svaraði nokkrum spurningum um tísku og fatastílinn minn í Sunnudagsblaði Morgunblaðsins um helgina. 
Hér fyrir neðan koma spurningar og svör. 

____________________
 


Hvað heillar þig við tísku?

Einna helst tjáningin og frelsið. Tíska gerir fólki kleift að tjá sig í gegnum fötin sem það klæðist. Hver og einn getur skapað sinn stíl - það er ótrúlega gaman að sjá hvað við erum öll ólík og hvað tískan hefur áhrif á hvernig við sjáum hvort annað. 

 

Hvernig myndir þú lýsa þínum fatastíl?
Hann er nokkuð fjölbreyttur en í stuttu máli er hann rómantískur með 70’s ívafi í bland við 90’s götutísku. Ég elska vintage föt og á orðið nokkuð gott safn af einstökum flíkum sem ég mun aldrei láta frá mér. Það er því orðið nokkurs konar hobbý að leita uppi vintage gersemar. 

 

Hefur þinn persónulegi stíll þróast mikið með árunum?
Já klárlega. Ég hef stundum verið alveg út og suður og fylgt allskyns trendum sem ég myndi ekki beint klæðast í dag. Ég lýt þó alls ekkert neikvæðum augum á þau tímabil - tíska er til þess að prufa sig áfram með og ég mun sennilega aldrei hætta því.
Ég reyni þó alltaf að vera samkvæm sjálfri mér og finnst stíllinn minn ná að endurspegla mig og minn karakter.  

 

Hvaðan sækir þú innblástur?
Ég sæki innblástur að mestu í gegnum tónlist, kvikmyndir og fólkið í kringum mig.
 

 

Áttu þér uppáhalds tískuhús/hönnuð?
Alessandro Michele yfirhönnuður Gucci er algjör snillingur og ég dýrka allt sem hann gerir.
Ég hef síðan alltaf heillast mikið af danskri hönnun líkt og flestir íslendingar og eru Malene Birger og Won Hundred í miklu uppáhaldi hjá mér.
Hildur Yeoman stendur síðan upp úr hér á landi en allt sem hún kemur nálægt er gullfallegt!
 

Hver hafa verið bestu kaupin þín?
Ætli ég verði ekki að nefna hvítu lambakápuna sem ég keypti nýverið af etsy.com – ég gjörsamlega elska hana og held ég muni alltaf gera.

 

Hvað er á óskalistanum þessa stundina?
Undanfarið hefur mig dreymt um Gucci hælaskó sem ég get ekki hætt að láta mig dreyma um.

 

Hvað hefurðu helst í huga þegar þú velur föt?
Ég reyni að velja gæði eftir bestu getu og eru góð efni lykilatriði. Eitthvað sem ég klikka alveg stundum á en er alltaf að sjá hvað þessi þáttur skiptir miklu máli bæði upp á endingu og notagildi.

 

Hvaða þekkta andlit finnst þér með flottan stíl?
Ég hef alltaf haldið mikið upp á stílinn hennar Nicole Richie. Upp á síðkastið hef ég verið að tengja mikið við eina ofurskvísu sem ég fylgi á instagram með notendanafnið happilygrey – mæli með að fylgja henni.

 

Hvað er nauðsynlegt í snyrtitöskuna?
Húðvörur sem gefa góðan raka og ljóma er eitthvað sem ég þarf helst að huga að þar sem að flugvélar er minn vinnustaður og þar er alls ekki besta loftið. Bioeffect 30 day treatment hefur verið að gera mjög góða hluti fyrir húðina mína.  Ég get síðan ekki lifað án highlighter - gerir allt betra! 

____________________